Ihr liewe Leit:
Heit lese mer was der Salli Holsbock (Harvey M. Miller, 1871-1939)
mol vum Hanning gschriwwe hot:
Ich hab ken diefi Lanning grickt;
Es waar als net die Ruul
Fer meh ass zwee, drei Munet
Weckfuule in der Schul.
Des Schtadie dutt uffs Hann so schaffe
Un's dutt eem oftmols Koppweh mache,
Doch meind ich heit noch paar so Sache
Vun seller alde Schul.
Ich hab gelannt die Grundsau kummt
Im Febbiwerri;
Sie graddelt aus me Loch im Grund
Im Febbiwerri;
Un wann sie ihre Schadde seht
Gebt's Eis un Rummadiss un's schneeht,
Un rode Naase uff de Meed
Im Febbiwerri.
Der alt Abe Lincoln waar gebore
Im Febbiwerri;
Zerrick en hunnert un so Yaahr
Im Febbiwerri;
En waar en grosser Bresident,
Un's Lanne waar sei Ellement,
En weltweit is ser nau erkennt
Im Febbiwerri.
Der Waelentein waar aa gebore
Im Febbriwerri.
Mer kaaft sie nau an all die Schtore
Im Febbiwerri;
Die scheene sin fer Tschentelleit,
Die Wieschde schicke sie fer Schpeit,
Awwer sell iss haali recht poleit
Im Febbiwerri.
Der Waschington waar aa en Kind
Vum Febbiwerri;
Er hot der Tschan Bull wiescht verschinnt
Im Febbiwerri;
Des waar der aerscht Mann in dem Land
Ass net geloge hot, sell's bekannt,
Un aa der letscht, denk ich, bei Gamm,
Im Febbiwerri.
Mei Lanning langt net weider aus
Ass Febbiwerri;
Awwer nemm der Tschortsch un Lincoln raus
Vum Febbiwerri;
Was waer dann unser Histry nau,
Was deet mer, saag mer, ennihau
Unne Waelentein un die alt Grundsau,
Im Febbiwerri?
Macht's gut,
Der Alt Professer
|
Dear people:
Today we are going to read what Solly Hulsbuck (Harvey M. Miller,
1871-1939) once wrote about February:
I never got any deep education;
It didn't used to be the rule
To fool away more that
Two, three months in school.
Studying works on the brain so,
And it often gives one a headache,
Yet I still remember today a few things
From that old school.
I learned that the groundhog comes
In February;
It crawls out of a hole in the ground
In February;
And when it sees its shadow,
There'll be ice and rheumatism and snow
And red noses on the girls
In February.
Old Abe Lincoln was born
In February:
Back a hundred and so years
In February;
He was a great president,
And education was his element,
And he is now known worldwide
In February.
Valentine was also born
In February;
One buys them now in all the stores
In February
The nice ones are for gentle people,
The ugly are sent in spite,
But that is hardly right polite
In February.
Washington was also a child
Of February;
He ill-treated John Bull terribly
In February;
He was the first man in the land (country)
Who didn't lie, that's well-known,
And he's the last, I think, by gum,
In February.
My learning doesn't go any farther
Than February,
But take out George and Lincoln
From February;
What would be our history now,
What would we do, tell me, anyhow,
Without Valentines and the old groundhog,
In February?
Take Care,
The Old Professor
|
